Germaniya chempionatining 31-turi doirasida jadvalning yuqori qismida borayotgan "Bavariya" va "Borussiya Dortmund" klublari Myunxenda to‘qnash kelishdi. Bu o‘yin esa joriy mavsumdagi chempion jamoa nomini aniqlab berdi.

Mezbonlar uchrashuvni ancha faol boshlashdi va birinchi bo‘limda ikkita gol urishga muvaffaq bo‘lishdi. 15-daqiqada Gnabri hisobni ochgan bo‘lsa, 34-daqiqada Levandovski farqni ikkitaga oshirdi.

Ikkinchi bo‘lim boshida Emre Jan penaltidan unumli foydalanib, uchrashuvga intrigani qaytardi. Ammo bahs tugashiga 7 daqiqa qolganida Jamol Musiala "Bavariya"ning uchinchi golini dortmundliklar darvozasiga urib, o‘yin taqdirini hal qilib qo‘ydi.

Shu tariqa, mavsum tugashiga 3 tur qolganida "Bavariya" va "Borussiya" jamoalari o‘rtasidagi farq 12 ochkoga yetdi. Shu bois, Nagelsmann shogirdlari muddatidan oldin chempionlikni naqd qilishdi.

Germaniya chempionati, 31-tur
Bavariya – Borussiya D 3:1 (2:0)
Gollar: 1:0 – 15 Gnabri, 2:0 – 34 Levandovski, 2:1 – 52, penalti Jan, 3:1 – 83 Musiala.
Bavariya – Noyer, Pavar, Ernandes, Upamekano, Devis, Goretska, Gnabri (Musiala, 63), Kimmix, Myuller (Zabitser, 82), Levandovski, Koman (Sane, 82).
Borussiya D – Xits, Akanji, Zagadu, Gerreyru, Jan, Brandt, Reynyer (Bayno-Gittens, 67), Bellingem, Volf (Mukoko, 88), Roys, Xoland (Passlak, 87).
Ogohlantirish: Jan (40).