Agar 8 iyungacha klub yangi xo‘jayinga ega bo‘lmasa, "Chelsi" kelasi mavsumda Premyer-ligadan chetlashtirilishi mumkin.
Aynan shu kuni liga rahbariyati jamoalarni keyingi mavsumga qabul qilish borasida qaror qabul qiladi.
Daily Mail nashrining yozishicha, klubning sotilishini sekinlashtirgan ikkita sabab bor. Birinchisi, klub uchun to‘langan pullar klub xo‘jayini Roman Abramovichning hisob raqamlariga tushmasligi, balki Britaniyada ommaviy futbolni rivojlantirishga yo‘naltirilishi sharti. Ikkinchi sabab - Abramovich "Chelsi"ning 1,6 milliard funt sterlinglik qarzini to‘lashdan bosh tortishi mumkin.
Eslatib o‘tamiz, 10 mart kuni Buyuk Britaniya Abramovichga qarshi sanksiyalar joriy qilgan edi. Premyer-liga rossiyalik funksionerni "Chelsi" boshqaruvidan chetlatdi. Tadbirkor klubni 4 milliard funt sterlingga sotishga qaror qildi va boshqaruvni xayriya jamg‘armasi vasiylariga topshirdi.
