“PSJ” yarim himoyachisi Marko Verratti jamoasining mag‘lubiyatli seriyasi sababini aytdi. Eslatib o‘tamiz, Maurisio Pochettino shogirdlari Fransiya chempionatining so‘nggi uch turidagi g‘alaba qozona olmayapti.

Italiyalik yarim himoyachining fikricha, hozirgi tarkib bilan "PSJ" mavsumning ayrim daqiqalarida yaxshiroq o‘ynashi mumkin edi.

“Bu qiyin mavsum bo‘ldi. "Real"ga qarshi o‘yin bizni "o‘ldirdi" deb o‘ylayman. Biz Chempionlar ligasida uzoqroqqa borishni xohlagandik. Biroq, biz yakunda faqat Fransiya chempionlikni qo‘lga kirita oldik", - deya Verratti so‘zlaridan keltiradi RMC Sport.

Eslatib o‘tamiz, Chempionlar ligasining 1/8 finalida "PSJ" "Real"ga umumiy hisobda (2:3) mag‘lub bo‘lib, musobaqani tark etgandi. Shunga qaramay, parijliklar turnir yakunlanishiga to‘rt tur qolganda muddatidan avval Fransiya chempionligini qo‘lga kiritishdi.