Italiyalik buyuk darvozabon Janluiji Buffonning futboldagi vaqti tugadimi? U yaqinda jamoasiga dahshatli tarzda pand berdi.
Muxlislar esa afsonaviy Jijidan tezroq nafaqaga chiqishini so‘rashmoqda. Xo‘sh, o‘zi nima bo‘ldi, qanday hodisot kuzatildi? Avvalo, qisqa ma’lumot: Buffon hamon katta futbol ichida! Afsonaviy darvozabon o‘tgan yozda «Yuventus» bilan xayrlashib, «V» seriyaga yo‘l oldi. Sermazmun faoliyatiga o‘zining ilk jamoasi - «Parma»da nuqta qo‘yish uchun. Alohida aytish kerak, faxriy kiper joriy mavsum muntazam ravishda maydonga tushmoqda, lekin yaqinda unda nimadir o‘xshamadi...
«Parma» Italiya chempionati «V» seriyasi 36-turida «Perudja» mehmoni bo‘ldi. Bu o‘yin Buffon va uning jamoasi uchun chinakam qulash lahzalariga aylandi. Parmaliklar 5-daqiqadayoq penaltidan tezkor gol qo‘yib yuborishdi. Keyin Jiji qattiq uyaltirdi: tajribali kiper orqaga yo‘llangan to‘pni beparvolik bilan himoyachi tomon uzatishga urindi, ammo... Qisqasi, Buffon tepgan to‘p yolg‘iz turgan raqib hujumchisi oyog‘iga borib tushdi va u bo‘sh qolgan darvozani osongina nishonga oldi. Oh, bu qanaqa xato Jiji?
«Parma» futbolchilari ikkinchi 45 daqiqalikda ancha tetiklashishdi, biroq 1ta javob goli urishdan boshqasiga ulgurishmadi. Tamom. Keyingi mavsumda «Parma» va Buffonni «A» seriyada kutayotgan bo‘lsangiz, buni unuting. Zero, vaqtida yevrokuboklarda ham zafarli odimlagan jamoa «Perudja» bilan o‘yindan keyin turnir jadvalining 13-pog‘onasiga tushib qoldi. Darvoqe, Jijiga faoliyatidagi eng «qora» gollardan birini «tortiq» etgan «Perudja»da yuqoriga ko‘tarilish imkoniyati yo‘q emas. «Parma» bosh murabbiyi Juzeppe Yakini matbuot anjumanida o‘yin yuzasidan ko‘p gapirdi, ammo Buffonni tanqid qilgani yo‘q. Klub saytida berilgan uchrashuv sharhida ham faxriy kiper xatosi haqida loaqal bir ibora yo‘q.
Nima, Buffon uchun katta futboldan ketish vaqti keldimi? Uning yanvar oyida 44 yoshga to‘lganini hisobga olsak, bu mantiqiy savol. Afsonaning qo‘pol xatosi haqidagi xabarlar ostiga muxlislar tomonidan yozilgan izohlarda ham shu mazmundagi maslahat-tavsiyalar yetarli. Ammo Jijining o‘zi qo‘lqoplarini hali mixga ilmoqchi emas. Har holda, u yanvarda shartnomasi muddatini 2024 yilgacha uzaytirdi. Shunday ekan, agar qandaydir kutilmagan voqelik yuzaga kelmasa, buyuk Buffon 46 yoshigacha o‘ynaydi.
