Turkiyada bo‘lib o‘tayotgan boks bo‘yicha ayollar o‘rtasidagi jahon chempionatida bugungi janglar boshlandi. O‘zbekistonliklar orasida Tursunoy Rahimova (52 kg.) birinchi bo‘lib o‘z jangini o‘tkazdi. Unga Ukraina vakili Tatyana Kob raqiblik qildi.
Ukrainalik sportchi butun jang davomida tavakkal qilib oldinga tashlangan bo‘lsa, Tursunoy raqibini kutib oldi. Bunda aniqlik hamyurtimiz tomonida bo‘ldi. Shunday bo‘lsa-da, raqib bokschisi vatandoshimizni ancha kuch sarflashga majbur etdi. Hattoki, Tatyana uchinchi raundda ochkolar bo‘yicha ustunlikka ham erishdi. Hakamlarning barchasi g‘alabani Rahimovaga berishdi — 5:0 (30-27, 29-28, 29-28, 29-28, 30-27).
Shu tariqa, Tursunoy Rahimova jahon chempionatining chorak finalga chiqdi. U yarim final yo‘llanmasi uchun tailandlik bokschiga qarshi ringga ko‘tiriladi.
Bugun yana 4 nafar hamyurtimiz nimchorak final jangini o‘tkazishadi.
