Turkiyada bo‘lib o‘tayotgan boks bo‘yicha jahon chempionatida bugun chorak final janglari boshlandi. Vakillarimiz orasida ringga birinchi bo‘lib terma jamoamiz sardori Tursunoy Rahimova (52 kg.) ko‘tarildi. Unga Tailand vakili Jutamas Jitpong raqiblik qildi.

Tailandlik sportchining avvalgi janglarini ko‘rib, shunday xulosa qilish mumkin ediki, u uzun qo‘llaridan foydalanib, masofadan "qochib urishadigan" bokschi toifasiga kirardi. Buni to‘g‘ri anglagan hamyurtimiz aynan uning uslubida jang olib borishga harakat qildi.

Birinchi bo‘limda hakamlarning barchasi ustunlikni raqibga berishdi. Ikkinchi taymda Tursunoy tajovuzkorlikni oshirdi. Boz ustiga, Jitpong muntazam qoida buzgani uchun referi undan 1 ballni olib tashladi. Bu esa Rahimova uchun ayni muddao edi. Ikkinchi raundda hakamlarning 3 nafari ustunlikni o‘zbekistonlik sportchiga berishdi. Natijada Rahimova hisobda oldinga o‘tib oldi.

Uchinchi bo‘limda bokschilar shiddatli bahs olib borishdi. Jangdan keyin esa hakam tailandlik Jutamas Jitpongning qo‘lini ko‘tarishdi.

Tursunoy 2020 yilning mart oyida Tokio Olimpiadasi lisenziyasi uchun kechgan jangda aynan Jutamasni mag‘lubiyatga uchratib, Olimpiadaga yo‘llanma olgandi. Afsuski, bu safar omad tailandlik bokschiga kulib boqdi.