Futbol bo‘yicha Jahon chempionati o‘tkaziladigan yilda O‘zbekiston FIFA World Cup™ Trophy Tour by Coca-Cola loyihasini o‘zida qabul qilishdan mamnun. Yil yakunida o‘tkaziladigan Mundial oldidan O‘zbekiston ushbu tarixiy kubok sayohat qiladigan dunyoning 51 mamlakatlaridan biri ekanligi katta sharafdir.

2022 yil o‘zbek futboli uchun katta ahamiyat kasb etadi. Chunki bu yil ko‘plab muxlislarni ruhlantiradigan va quvonchiga sabab bo‘ladigan futbol yurtimizga kirib kelganining 110 yilligi nishonlanmoqda.

Shuni alohida ta’kidlash kerakki, mamlakatimizga va futbolimiz hamjamiyatiga bildirilayotgan bunday ishonch yurtimizda Prezidentimiz Shavkat Mirziyoyev boshchiligida so‘nggi yillarda amalga oshirilayotgan islohotlar, shu jumladan, sportning futbol turiga qaratilayotgan e’tibor natijasidir.

FIFA, O‘zbekiston Futbol assosiasiyasi hamda Coca-Cola muxlislar uchun ana shunday festival tashkil etish, futbol bo‘yicha Jahon kubogini ko‘rish imkoniyatini taqdim etish borasidagi o‘zaro hamkorlikdan mamnun. 6 iyun kuni Kubok taqdimotida, shuningdek, Jahon chempionlari Kristian Karambyo va Karles Puyol ishtirok etishi kutilmoqda.

Biz ushbu tadbirlar yuqori darajada o‘tkazilishi uchun bor imkoniyatimizni ishga solamiz va yana bir bor hamkorlarimiz FIFA va Coca-Cola'ga ishonch uchun minnatdorchilik bildiramiz. Ishonamizki, kelayotgan futbol bayrami mamlakatimizning katta futbol tadbirlari mezbonligiga tayyor ekanligini yana bir bor namoyon etadi.