UEFA 2023 yilgi Yevropa Superkubok uchrashuvini Rossiyaning Qozon shahridan boshqa mamlakatga ko‘chirish bo‘yicha ishlar olib bormoqda.
ESPN xabariga ko‘ra, UEFA mutasaddilari hozirda o‘yin o‘tkazish uchun yangi stadion qidirmoqda.
Qozon 2020 yilda UEFA Superkubogini o‘tkazish huquqini qo‘lga kiritdi. Uchrashuv "Ak Bars Arena"da bo‘lib o‘tishi kutilgandi.
Avvalroq Rossiyaning barcha jamoalari keyingi mavsum uchun UEFA tasnifidagi xalqaro turnirlarda ishtirok etishdan chetlashtirilgan edi. Sankt-Peterburgning "Zenit" klubi stadioni hisoblangan "Gazprom Arena" esa 2022 yilgi Chempionlar ligasi finali o‘yinni o‘tkazish huquqidan mahrum etildi. Uchrashuv 28 may kuni Parijda bo‘lib o‘tadi.
Ma’lumot o‘rnida, 2022 yilgi Superkubok uchrashuvi 10 avgust kuni Xelsinkida bo‘lib o‘tadi.