21 may kuni futzal bo‘yicha Oliy liga-2021/22 mavsumi yakunlandi. Chempionlikni qo‘lga kiritgan «Jizzax-Kenteks» jamoasi bosh murabbiyi Bahodir Ahmedov mavsumning eng yaxshi murabbiyi deb topildi. U mavsum borasida o‘z fikrlari bilan o‘rtoqlashdi.

"Bu mavsumni tashkiliy masalalar bo‘yicha alohida ta’kidlab o‘tadigan jihatlari ko‘p bo‘ldi. Birinchidan, O‘zPFL uchrashuvlarni jonli efirga olib chiqdi. Bu futzalni yanada ommaviylashtirishga yordam beradi.

Ikkinchidan, U18 Chempionatiga asos solindi. Bu meni juda quvontirdi. Ushbu musobaqaga terma jamoa uchun yosh futzalchilarni tayyorlab beruvchi fabrika sifatida qarasa ham bo‘ladi.

Jamoa bosh murabbiylari va sardorlari, shuningdek muxlislar o‘rtasida ovoz berish yo‘li bilan mavsumning eng yaxshilari aniqlandi. Bu mavsum mening bosh murabbiy sifatida birinchi tajribam bo‘ldi. Eng yaxshi murabbiy sifatida e’tirof etishlarini kutmagandim. Buning uchun jamoam o‘yinchilariga, barcha hamkasblarimga va muxlislarga minnatdorchilik bildiraman.

Tarkibimizda Jizzax viloyati hokimi Ergash Saliyev maydonga tushdi. Mening fikrimcha, bu futzalchilarga qo‘shimcha motivasiya bo‘ldi. Viloyat rahbari professional sport bilan shug‘ullanishini alohida e’tirof etish lozim", — dedi Bahodir Ahmedov.