Yevropa konferensiyalar ligasi musobaqasi finalida "Roma" Niderlandiyaning "Feyenoord" klubi bilan to‘qnash kelib, kichik hisobda g‘alaba qozondi. UEFA.com muxbirlari o‘yin taqdirini hal qilgan vaziyatlarga to‘xtalib o‘tishdi.

Tutqich bermas Dzanyolo
Nikolo Dzanyolo yana kerakli joyda va kerakli vaqtda paydo bo‘ldi hamda musobaqa doirasida mavsumdagi beshinchi golini urdi. Yarim himoyachi avvalroq "Bude-Glimt"ga qarshi chorak final bahsida 3ta gol muallifiga aylanan bo‘lsa, guruh bosqichida "Zarya" darvozasini bir marta ishg‘ol qilgandi. Dzanyolo finalda ham o‘zini ko‘rsatdi va o‘z imkoniyatidan samarali foydalandi.

Himoyada ishonchli, hujumda xavfli o‘yin
Mourinyo tomonidan ishlab chiqilgan taktik reja deyarli ideal ishladi. Rimliklar o‘zlarining ilk imkoniyatlaridan unumli foydalanishgan bo‘lsa, "Feyenoord" hujum qilayotganida raqib imkoniyat bermaslikka harakat qilishdi. Mourinyo shogirdlari himoyada mustahkam o‘yinni qo‘yishgach, hujumga dadil tashlanishdi. Bunda markazda Lorenso Pellegrini, qanotlarda esa Nikola Zalevski va Rik Karsdorpning harakatlarini e’tirof etish joiz. "Bo‘rilar" hisobni ochishganidan so‘ng ham ustunlikni raqibga berib qo‘yishmadi. To‘g‘ri, ustunlik sezilarli bo‘lmadi, ammo shuning uchun sovrin yutish uchun yetarli bo‘ldi.

Eng yaxshi himoya — hujum
Futbolda shunday maqol bor. "Feyenoord" buni amalda qo‘llashga urinib ko‘rdi, ammo muvaffaqiyat qozona olmadi. Niderlandiyaliklar birinchi taymda to‘p bilan va to‘psiz u qadar yaxshi harakat qila olishmadi. Natijada jamoa tanaffusga qadar "Roma"ga hech qanday bosim o‘tkaza olmadi. Bu esa rimliklarni qanoatlantirdi. Rotterdamliklarning bunday o‘yini Dzanyoloning goli bilan yakunlandi.

Smolling Dessersni qurolsizlantirdi
"Feyenoord"ning asosiy kuchi va musobaqaning eng yaxshi to‘purari hisoblangan Siril Dessersni "Roma" himoyachisi Kris Smolling to‘liq ishdan chiqardi. Angliyalik futbolchi to‘p uchun yakkakurashlarning aksariyatida g‘olib chiqdi, raqibga bo‘sh hudud qoldirmadi. Eng muhimi esa, Smolling raqib hujumchisining zarbavor vaziyatga chiqishiga yo‘l qo‘ymadi. "Feyenoord" hujumida mas’uliyatni o‘ziga oladigan boshqa futbolchi topilmadi.