"Manchester Siti" yarim himoyachisi Ilkay Gyundogan jamoada qolishni istashini aytdi. Avvalroq, germaniyalik yarim himoyachi jamoani tark etishi bilan bog‘liq mish-mishlar tarqalgan edi va uning xizmatlariga Bundesliganing bir nechta klublari qiziqish bildirayotgani aytilgandi.
“Yaqin vaqtlarda klub bilan vaziyatni muhokama qilamiz. Biz muzokaralar stoliga o‘tiramiz, fikr almashamiz va eng yaxshi qarorni qabul qilamiz. Rostini aytsam, men uchun Gvardiola qo‘l ostida "Manchester Siti"da o‘ynashdan ko‘ra yaxshiroq kelajakni tasavvur qilishim qiyin", - deya futbolchining so‘zlarini keltiradi Sport Witness.
Eslatib o‘tamiz, o‘tgan yakshanba kuni Gyundogan "Aston Villa"ga qarshi o‘yinda dubl qayd etdi va bu jamoaga Premyer-liga chempionligini taqdim etdi.
