"Манчестер Сити" ярим ҳимоячиси Илкай Гюндоган жамоада қолишни исташини айтди. Аввалроқ, германиялик ярим ҳимоячи жамоани тарк этиши билан боғлиқ миш-мишлар тарқалган эди ва унинг хизматларига Бундеслиганинг бир нечта клублари қизиқиш билдираётгани айтилганди.
“Яқин вақтларда клуб билан вазиятни муҳокама қиламиз. Биз музокаралар столига ўтирамиз, фикр алмашамиз ва энг яхши қарорни қабул қиламиз. Ростини айтсам, мен учун Гвардиола қўл остида "Манчестер Сити"да ўйнашдан кўра яхшироқ келажакни тасаввур қилишим қийин", - дея футболчининг сўзларини келтиради Sport Witness.
Эслатиб ўтамиз, ўтган якшанба куни Гюндоган "Астон Вилла"га қарши ўйинда дубл қайд этди ва бу жамоага Премьер-лига чемпионлигини тақдим этди.