O‘zbekiston terma jamoasi sobiq bosh murabbiyi Vadim Abramov «VsyoProSport» muxbiri bilan suhbatda Yevropa konferensiyalar ligasi finalida bo‘lib o‘tgan «Roma» va «Feyenoord» jamoalari o‘rtasidagi uchrashuv (1:0) borasida o‘z fikrlarini bildirib o‘tdi. Mazkur o‘yinda o‘zbekistonlik hujumchi Eldor Shomurodov o‘yin tugashiga 1 daqiqa qolganida zaxiradan maydonga tushdi. U musobaqa doirasida 11ta o‘yinda ishtirok etdi.

«Shaxsan Shomurodov uchun Konferensiyalar ligasidagi g‘alaba — ulkan muvaffaqiyat. Biz Eldor bilan faxrlanamiz. Albatta, bu Chempionlar ligasi emas, ammo bu Yevropa bozori. Bundan tashqari, Shomurodovning ushbu turnirdagi o‘yini — o‘zbek futboli uchun reklama. Futbolchimiz bosh murabbiy Mourinyo berayotgan kichik imkoniyatlarda samarali foydalanishga harakat qilmoqda. Bu esa "Roma"ga foyda keltirmoqda. Eldor zaxiradan maydonga tushib, jamoa o‘yinini kuchaytirishi mumkin bo‘lgan futbolchi hisoblanadi.

Albatta, men Mourinyo emasman, u nima uchun Shomurodovga kam o‘yin amaliyotini berayotganini tushunmayman. U klubda har kuni ishlaydi. Ehtimol, Abraxam mashg‘ulotlarda yaxshiroq ko‘rinayotgandir. "Roma"da qolish yoki qolmaslik masalasini Eldorning o‘zi hal qilishi kerak. Har qanday jamoaga moslashish uchun vaqt kerak bo‘ladi. Balki, u ayni paytda «Roma»ga moslashib olib, keyingi mavsumda boshqacha o‘yin namoyish etar.

Bundan tashqari, Mourinyoning fikri ham muhim ahamiyatga ega. Buni futbolchi murabbiy bilan muhokama qilib olishi kerak. Shomurodov – haqiqiy jangchi. U Yevropada o‘ynashni orzu qilgan. «Roma» – Yevropaning jiddiy jamoalaridan biri. Ishonchim komil, sobiq ittifoq mamlakatlarining 90 foiz futbolchilari bunday darajada to‘p tepishni istaydi. Shunchaki, Rossiyadagi maoshlar Yevropadagiga nisbatan ko‘proq. O‘yinchilar faqat maosh tufayli Rossiyada qolishadi, deb o‘ylamayman.

Boshqa tomondan, ushbu mintaqa futbolchilariga talab yuqori emas, aks holda ular kuchli jamoalarga yo‘l olgan bo‘lishardi. Shomurodovga taklif tushdi va u Italiyaga yo‘l oldi. Agar rossiyalik futbolchilarga ham shunday taklif tushsa, ular buni rad etishmasa kerak. Shunchaki, Yevropaga borgandan keyin nimalarga qodirligini isbotlash kerak bo‘ladi. Shomurodov ham qanchalik iqtidorli bo‘lmasin, u ham o‘zini ko‘rsatishi shart. Yevropada sobiq SSSR mamlakatlaridan kelgan futbolchilarga nisbatan munosabat u qadar yuqori emas. Shuning uchun bizning o‘yinchilar Yevropada joylashib qola olishmagan.

O‘ynab keta olgan futbolchilar barmoq bilan sanarli. Ulkan sovet ittifoqini kichkina Niderlandiya va Belgiya bilan taqqoslaydigan bo‘lsak, bu mamlakatlar o‘yinchilari Yevropada yaxshi natijalarga erishishgan», - dedi Abramov.