«Ayaks» klubi rahbariyati bosh murabbiy lavozimiga Alfred Shryoder rasman tasdiqlanganini e’lon qildi. Amsterdam jamoasi rasmiy saytida berilgan xabarga ko‘ra, niderlandiyalik 49 yoshli mutaxassisi bilan 2 yillik shartnoma tuzildi. Tomonlar muddatni avtomatik ravishda yana bir mavsumga uzaytirishlari mumkin.
Alfred Shryoder «Ayaks»dan «MYU»ga yo‘l oladigan Erik ten Xag o‘rnini egallaydi. U mavsum-2018/2019da aynan Amsterdam klubida ten Xag assistenti rolini bajargandi. Shryoder keyinchalik «Barselona»da Ronald Kumanga yordam berdi. 2022 yilning yanvar oyida esa Belgiya ligasi ishtirokchisi - «Bryugge» boshqaruvini qo‘lga olgandi.
Fakt. Qiziqarli ma’lumot: «Ayaks» rahbariyati oxirgi vaqtlarda faqat taqirbosh murabbiylarni tanlamoqda. Har holda, Amsterdam jamoasi boshqaruvida ishlagan (ishlaydigan) oxirgi 4 nafar mutaxassisning hech birida sochi yo‘q. Bular - Peter Bosh, Marsel Keyzer, Erik ten Xag va Alfred Shryoder. Nima, Niderlandiya grandining muvaffaqiyati siri shumikan...?
