Deyarli bir hafta oldin Parijda Chempionlar ligasi finali bo‘lib o‘tgan edi, ammo o‘sha kundagi voqealar hali ham qizg‘in muhokama qilinmoqda - qizig‘i, maydonda sodir bo‘lgan voqealar haqida gap bormayapti.
“Stad de Frans” atrofida ko‘zdan yosh oqizuvchi gaz qo‘llanilgan paytdagi tartibsizliklar va yuzlab muxlislarning devordan sakrab o‘tib, stadionga intilishi sababli vaqtida boshlanishi kerak bo‘lgan bahs yarim soatdan ko‘proqqa cho‘zildi.
O‘shanda chiptasi bor 2700 muxlis maydonga kira olmadi. O‘sha kuni juda ko‘p yorqin va keskin dronlardan foydalanildi.
Bir hafta ichida ham ushbu voqealar to‘lig‘icha yopilgani yo‘q. Juma kuni "Real Madrid" va "Liverpul" UYEFAga biryo‘la murojaat yo‘llashdi.
"Real Madrid" final nima uchun Parijga berilgani va unga kim javobgarligini aniqlashni talab qilmoqda. Madrid klubi o‘z muxlislarini vaziyat qurboni deb atadi va asosli tushuntirishlarni talab qildi.
• Final o‘yinini o‘tkazish joyi sifatida “Stad de Frans” qanday asoslarga ko‘ra tanlangani bosh savolga aylandi. “Biz aynan shu joyni tanlashga nima sabab bo‘lganini, o‘sha kuni sodir bo‘lgan voqealarni hisobga olgan holda qanday mezonlar inobatga olinganini bilmoqchimiz”, - deyiladi bayonotda.
• Bularning barchasiga kim javob beradi: “Muxlislarning nochor va himoyasiz qolib ketganiga kim javob beradi? Ulardan ayrimlarining bu voqealar davomidagi xatti-harakati ibratli edi. O‘ylaymizki, o‘yinga hozir bo‘lgan barcha muxlislar uchun ajoyib futbol bayrami bo‘lishi kerak edi, biroq u qayg‘uli yakunlandi va butun dunyoda chuqur g‘azabga sabab bo‘ldi".
"Real Madrid" tafsilotlarni to‘laligicha bayon etdi. Aniqlik kiritilishicha, ko‘plab muxlislar shafqatsiz hujumlar, ta’qiblar va hatto o‘g‘irliklarga ham uchragan - ba’zilari jarohatlar bilan kasalxonaga yotqizilgan: “Muxlislarimizga barchasi tushuntirib berilishi kerak. Bunday narsalar futboldan butunlay yo‘qolishi kerak", - deydi klub rahbari.
"Liverpul" tergov o‘tkazilishiga undamoqda, muxlislardan ko‘rsatmalar yig‘yapti va psixologik yordam taklif qilgan. Klub bosh ijrochi direktor Billi Xogan bilan yetti daqiqalik video intervyu qildi, unda u Parijda sodir bo‘lgan voqealar haqidagi savollarga javob bergan.
Mana uning asosiy fikrlari:
• Xogan fransuz vazirlariga "hujum" uyushtirdi: (Chunki Fransiyadagi sport vaziri tartibsizliklarda “Liverpul” muxlislarini ayblagan, ichki ishlar vaziri hatto, aybning bir qismini Yurgen Kloppga ham yuklagan): “Hech kim muxlislar boshidan kechirgan narsalarni o‘z boshdan kechirishi shart emas. Stadionga kirish va undan chiqish haqiqatan ham uyatli tarzda tashkil etilgan. Odamlar xafa bo‘ldi va endi ular Fransiya vaziridan faqat "Liverpul" muxlislarida muammo bo‘lganini eshitishdi. Bu shunchaki uyat. Men bu bayonotlarning barchasi haqiqat deb o‘ylamayman. Biz ularga shunchaki ishonmaymiz, tamom. «Real» ham tergov o‘tkazilishini xohlamoqda - biz Madrid klubidagi hamkasbimiz bilan bu haqda gaplashdik. Bizda ham, ularda ham yetarlicha dalil bor. Biz UYEFAga yana yozdik, 13 ta aniq savol berdik, zudlik bilan tergov o‘tkazilishini talab qilamiz”.
• "Liverpul" onlayn shaklda faktlar va kuzatishlarni to‘plamoqda: "6500 dan ortiq odam shanba kuni o‘zlari bilan nima sodir bo‘lganini yozgan holda bizga murojaat qilishdi. Ular bizga ko‘plab fotosuratlarni ham yuborishdi. Bilaman, yana bu voqealarga qaytish oson bo‘lmadi, shuning uchun chin qalbimdan bizga bu yo‘lda yordam bera olganlarga rahmat aytaman", — deyiladi intervyuda.
Shuningdek, u quyidagilarni ham aytib o‘tdi: «Klub jabrlanganlarga yordam taklif qildi. Odamlar do‘stlari, oilasi, yaqinlari bilan boshidan kechirganlari haqida gapirishlari muhim. Klub fondi orqali biz jabrlanganlarga shoshilinch yordam ko‘rsatdik. Bundan tashqari, turli tibbiy tashkilotlarga moliyaviy yordam berishga va’da berdik. Muxlislarning ichidan ham agar yordam berishni xohlaganlar bo‘lsa, bunga da’vat etib qolamiz. UYEFA bizdan uzr so‘radi. Ularning aytishicha, o‘yin Parijga berilgan, chunki «PSJ» bosh murabbiyi o‘z maydonidagi finalga haqiqatan ham ishongan. Ko‘pchilik muxlislar bunday so‘zlarni o‘z vaqtida bo‘lmadi deb hisoblamoqda. Ular avvalroq kechirim so‘rashlari mumkin edi».
Shahar meri o‘z pozisiyasini arena joylashgan Sen-Deni kommunasida ko‘plab muhojirlar borligi, jinoyatchilik darajasi yuqoriligi, ya’ni ko‘p sonli aholining xavfsizligini kafolatlash qiyinligi bilan izohladi. Nashrning aniqlik kiritishicha, Al-Xelayfi va Cheferin o‘z manfaatlarini birinchi o‘ringa qo‘yishgan: finalni Sankt-Peterburgdan qayerga ko‘chirishga qaror qilinganida, “PSJ” 1/8 finalning “Real”ga qarshi birinchi o‘yinida mag‘lub bo‘lgandi, biroq parijliklar finalga chiqishiga ishondi va buni o‘z muxlislari qarshisida o‘tkazishni xohlashdi.
