Ayni paytda ijara asosida «Lion»da to‘p surayotgan, huquqiy jihatdan «Real»ga tegishli bo‘lgan Endrik, «qaymoqranglar»ning sobiq yarim himoyachisi Luka Modrich haqida yuqori fikr bildirdi. Modrich hozirda «Milan» safida o‘ynamoqda.

«Luka Modrich — “Real”da meni eng ko‘p hayratga solgan futbolchi, 100%. U jamoadagi birinchi yilimda menga juda ko‘p narsani o‘rgatdi. Bu faqat mashg‘ulotlar bilan cheklanmaydi, balki o‘yinlarni ham o‘z ichiga oladi. U haqiqiy mahorat darsini o‘tdi. O‘sha paytda Modrich 40 yoshda edi, juda kuchli edi va har kuni mashg‘ulot o‘tardi. U o‘ynamagan paytlarida ham klub bazasiga kelib, mustaqil ravishda shug‘ullanardi. Uning mahorat darajasi shunchaki hayratlanarli. U doimo menga maslahatlar berib, maydonda nima qilishim kerakligini tushuntirardi — bu menga juda yordam berdi. Modrich — futbol olamida uchratgan eng yaxshi insonlardan biri», — deydi Endrik The Guardian nashriga bergan intervyusida.

Luka Modrich 2012–2025 yillar davomida «Real» safida to‘p surdi. U jamoa tarkibida 597 ta o‘yinda ishtirok etib, 49 ta gol urdi va 95 ta golli uzatma amalga oshirdi. Xorvat futbolchisi jamoa bilan birga 27 ta sovrinni qo‘lga kiritgan, jumladan, Chempionlar ligasida 6 bor g‘olib bo‘lgan. Shaxsiy sovrinlar orasida «Oltin to‘p», shuningdek UEFA va FIFA tomonidan yilning eng yaxshi futbolchisi mukofotlarini qo‘lga kiritgan.