Argentinalik hujumkor yarim himoyachi Anxel di Mariya o‘z faoliyatidagi yana bir bobni yopdi.
Bunga qadar «Rosario», «Benfika», «Real» va «MYU» klublarida javlon urgan futbolchi «PSJ» bilan 7 yillik hamkorligiga nuqta qo‘ydi. Argentinalik allaqachon ijtimoiy tarmoqlarda Parij klubi va uning muxlislari bilan xayrlashishga ulgurdi. Ha, Fransiya poytaxti bu futbolchini hali ko‘p qo‘msasa kerak. Zero, sog‘inish uchun sabablar yetarli...
294ta o‘yin, 92ta gol, 118ta samarali uzatma va 19ta sovrin - bu Anxel di Mariyaning «PSJ»dagi 7 yillik faoliyati samarasi. Bosh rolga uncha da’vo qilmaydigan argentinalik oxirgi 7 yilni shu qadar barqaror va xotirjam o‘tkazdiki, unga ko‘plab futbolchilar shunchaki, havas bilan boqishlari mumkin. 19ta sovriniga kelsak, ularning barchasi ichki turnirlarda qo‘lga kiritildi. Di Mariya - Fransiya chempionati, mamlakat kubogi va superkubogining 5 karradan g‘olibi, uning hisobida yana 4ta Liga kubogi bor. Ha, ozgina kemtik ham bor - bu yevrokuboklar yo‘qligi. Bir kam dunyo-da, baribir...
2011 yili Xorxeline Kardoso bilan turmush qurgan Anxel hozirda Mia (2013 yil) va Pia (2017 yil) ismli qizaloqlarning baxtli otasi. Umuman olganda, u jahon futbolidagi eng sovrindor futbolchilar qatorida. Deylik, faqat klub futbolini olsak, «PSJ»dagi 19ta sovrindan tashqari, «Benfika» va «Real»da ham katta kolleksiya yaratgandi. Ya’ni Portugaliyada 3ta (milliy chempionat oltin medali va 2ta Liga kubogi), Ispaniyada esa 6ta (milliy chempionat oltin medali, 2ta milliy kubok, mamlakat superkubogi, CHL va Yevropa superkubogi) sovrin yutgandi. Xullas, Yevropada argentinalik futbolchining faqat «MYU»dagi davri samarasiz kechdi, xolos.
O‘z o‘rnida yana bir ma’lumot: «PSJ» maosh xarajati bo‘yicha Yevropaning 1-raqamli jamoasi bo‘lib oldi. Biroq shu ham klubga qit’a miqyosida yutuqni kafolatlayotgani yo‘q. Diqqatni tortadigan fakt shuki, «PSJ»ning maosh jamg‘armasi Liga 1dagi aksariyat klublarning umumiy byudjetidan ham katta.
Anxel di Mariyaning shaxsiy yutuQlari
Argentinaning eng yaxshi futbolchisi: 2014 yil
Ispaniya chempionatining eng yaxshi assistenti: 2013/2014
Fransiya chempionatining eng yaxshi assistenti: 2015/2016
CHL finalining eng yaxshi futbolchisi: 2014
CHLning eng yaxshi assistenti: 2013/2014
CHL ramziy terma jamoasi a’zosi: 2013/2014
JCH ramziy terma jamoasi a’zosi: 2014
Jahon ramziy terma jamoasi a’zosi (UYEFA talqini): 2014
Jahon ramziy terma jamoasi a’zosi: (FIFA talqini): 2014
Anxel di Mariyaga faoliyatining «PSJ» atalmish bob to‘kis bo‘lishi uchun yev-roarenadagi g‘a-laba yetishmagani - ayni haqiqat. Shu joyda goal24 sayti taqdim etgan bitta qiziqarli foto-faktni keltirish joiz. Qarang, suratda berilgan 6 nafar futbolchi - David Luiz (Braziliya), Zlatan Ibragimovich (Shvesiya), Kevin Gameyro (Fransiya), Kingsli Koman (Fransiya), Tyago Silva (Braziliya) va Kevin Trapp (Germaniya)ni bir jihat o‘zaro bog‘lab turibdi. Qanday? Ular «PSJ» bilan xayrlashganlaridan keyin qaysidir yevrokubokni boshlari uzra baland ko‘tarishdi. «PSJ» esa bu vaqtda yevroarenada g‘alaba qozonolmay armonda...
