"Barselona" prezidenti Joan Laporta ayollar jamoasining Ispaniya chempionatida "Real" ustidan 7:0 hisobida qozongan g‘alabasiga munosabat bildirdi. U, shuningdek, o‘yinga 40 533 nafar muxlis tashrif buyurib, Ispaniya ayollar chempionatida yangi rekord o‘rnatilganini ta’kidladi.

"Bu ajoyib o‘yin va haqiqiy futbol bayrami bo‘ldi. Ispaniya ayollar chempionatida tashrif bo‘yicha rekord o‘rnatganimizdan faxrlanamiz", — deya Laportaning so‘zlarini sport.es keltirdi.

"Barselona" prezidenti raqib o‘yinini ham alohida ta’kidladi:

"Real" har doim kuchli raqib bo‘lib kelgan. Bizning jamoamiz hamon juda raqobatbardosh. Ular yaxshi o‘ynashdi, biz esa hujumlarni yakunlashda aniq harakat qildik".

Kuchli yomg‘ir sabab uchrashuv boshlanishi ikki soatga kechiktirildi. Laporta og‘ir ob-havoga qaramay stadionga kelgan muxlislarga minnatdorlik bildirdi.

"Kuchli yomg‘irga qaramay, odamlar stadionga kelishdi. Yaxshiyamki, hech qanday jiddiy hodisa sodir bo‘lmadi".

"Biz Yevropa chempionlarimiz. Chempionat, Kubok, Superkubok va Chempionlar ligasida g‘alaba qozondik. Biz to‘g‘ri yo‘ldamiz va shu yo‘nalishda ishlashda davom etyapmiz. Eng qiyini — cho‘qqida qolish. So‘nggi olti mavsumda to‘rt marta Chempionlar ligasida g‘alaba qozondik va bu chindan ham ulkan yutuq".

"Barselona" 18 ochko bilan ayollar chempionati turnir jadvalida peshqadamlik qilmoqda. "Madrid" va "Real" hisobida 13 tadan ochko bor.