Fransiya terma jamoasining sobiq futbolchisi Kristof Dyugarri Argentina va Benin o‘rtasidagi uchrashuv qanday tashkil etilganidan norozi bo‘ldi.

«Bu voqeadan hech kim pul ishlamayapti, degan tasavvurni yaratish kerak emas. Bu yerda hamma manfaat ko‘ryapti. Afrikalik futbolchilarga hech qanday hurmat yo‘q, muxlislarga ham hurmat yo‘q, umuman hech kimga hurmat yo‘q. Bu Janni Infantinoning haqiqiy qiyofasi. Bu sharmandali o‘yin», — deya Dyugarrining so‘zlarini RMC Sport keltiradi.

Avvalroq Benin Argentinaga qarshi o‘yinda ishtirok etgani uchun haq olmasligi, shuningdek, chiptalar, teletranslyasiya huquqlari va homiylik tushumlaridan ulushga ega bo‘lmasligi xabar qilingan edi. Argentina tomoni faqat delegasiyaning aviaparvoz va yashash xarajatlarini qoplashi kerak bo‘lgan.

Argentina — Benin uchrashuvi 7 oktyabr kuni Buenos-Ayresda bo‘lib o‘tadi. Uchrashuv Toshkent vaqti bilan soat 04:00 da boshlanadi.