Avstriyaning “Red Bull Zalsburg” klubi himoyachisi Rasmus Kristensen “Lids Yunayted”ga ko‘chib o‘tdi, deya xabar beradi “tovuslar” rasmiy sayti.

24 yoshli daniyalik bilan shartnoma 2027 yilning yoziga qadar mo‘ljallangan.

Transfermarkt internet portali kelishuv narxini 12 million yevro, statistik manba esa futbolchining bozor narxini 15 million yevroga baholagan.

Kristensen 2019 yilning iyulidan buyon “Red Bull Zalsburg” safida to‘p tepayotgan edi. U 2021/2022 yilgi mavsumda 44 ta o‘yinda maydonga tushib, 10 ta gol urdi va 8 ta golli uzatmani amalga oshirdi.