23 yoshgacha bo‘lgan futbolchilar o‘rtasidagi Osiyo chempionatining chorak final bosqichida O‘zbekiston terma jamoasi deyarli butun o‘yin davomida Iroqqa qarshi bir kishi kam bo‘lib to‘p tepib, penaltilar seriyasida g‘alaba qozondi. Iroq matbuoti mazkur o‘yindagi taktika uchun chexiyalik murabbiy Miroslav Soukupni tanqid ostiga oldi. Ushbu maqolani tarjima qilgan holda e’tiboringizga havola etamiz.

"Miroslav Soukup boshchiligidagi Iroq olimpiya terma jamoasi O‘zbekistonga qarshi 98 daqiqa davomida bir kishi ko‘p bo‘lib o‘ynab, bu imkoniyatdan foydalana olmadi. Boisi, o‘zbekistonliklar darvozaboni 12 daqiqada maydondan chetlatilgandi.

Soukup raqibni taslim etish uchun birinchi bo‘limda kerakli taktikani qo‘llay olmadi. Darvozabon maydondan chetlatilgach, Iroq oldinga tashlanmadi, himoyaviy taktikada o‘ynashda davom etdi.

Himoyadagilar esa xatolarga yo‘l qo‘yib, ko‘p sariq kartochkalar olishdi. Shu bois, O‘zbekiston bosim qilishni davom ettirdi. Ular iroqliklarning bu sustkashligidan foydalanib, birinchi bo‘lim so‘ngida penalti tepish huquqini qo‘lga kiritishdi va hisobni tenglashtirishdi.

Ikkinchi bo‘lim boshlanganda ham Iroqning lanj o‘yini davom etdi. O‘yinni kuchaytira oladigan futbolchi topilmadi. Mudofaadagi tartibsiz harakatlar tufayli mezbonlar hisobda oldinga o‘tib olishdi.

Iroqning o‘yinidagi faollikni faqat 58-75-daqiqalar oralig‘ida ko‘rdik. Hasan Abdulkarim va Ammar G‘olib juftligi raqib darvozasi oldida xavfli vaziyatlarni yuzaga keltira olishdi. Shu bois, G‘olib individual mahorat evaziga hisobni tenglashtirdi.

Qo‘shimcha bo‘limda Soukup himoyani musthakamlashga qaratilgan o‘zgarishlarni amalga oshirib hayron qoldirishda davom etdi. Vaholanki, u hujumkor futbolchi Xiran Ahmadni maydonga tushirishi mumkin edi. Temur Kapadze esa hujumga yangi kuchlarni tashlab, o‘yin taqdirini ertaroq hal etishga urindi. O‘zbekiston bir kishi kam bo‘lib o‘ynaganiga qaramay, texnik, jismoniy va ruhiy jihatdan ustunlikka erishdi.

Miroslav Soukupning ishini Iroq futbol assosiasiyasi rahbariyati tahlil qilib, uning keyingi taqdirini masalasiga oydinlik kiritadi".