Kosta-Rika milliy jamoasi Qatarda bo‘lib o‘tadigan jahon chempionatining so‘nggi ishtirokchisiga aylandi. Shimoliy Amerika saralashida 4-o‘rinni egallagan ushbu jamoa qit’alararo saralash pley-off bahsida Okeaniya mintaqasi g‘olibi Yangi Zelandiya bilan to‘qnash keldi.

Kosta-rikaliklar uchrashuvning 3-daqiqasida Xoel Kempbellning goli evaziga hisobni ochishdi. Taym oxirida yangi zelandiyaliklar hisobni tenglashtirishgandi. Ammo hakam videotakrorni tomosha qilgach, hujumning boshlang‘ich qismida qoidabuzarlik aniqladi va golni bekor qildi.

Ikkinchi bo‘lim o‘rtalarida osiyolik hakam yana bir marta Yangi Zelandiya zarariga qaror chiqardi. U vaziyatni qayta tomosha qilgach, Yangi Zelandiya terma jamoasi a’zosi Barbarusesga qizil kartochka berdi.

Kosta-Rika o‘yin oxirigacha hisobdagi ustunlikni saqlab qoldi va JCH-2022 yo‘llanmasini qo‘lga kiritdi. Jamoa Ispaniya, Germaniya va Yaponiya o‘rin olgan "E" guruhiga borib qo‘shildi.

JCH-2022 saralash. Qit’alararo pley-off bahsi
Kosta-Rika – Yangi Zelandiya 1:0 (1:0, 0:0)
Gol: 1:0 – 3 Kempbell.
Kosta-Rika – Navas, Fuller (Martines, 46), Duarte, Kalvo, Ovyedo, Torres (Uoston, 46), Borxes (Chakon, 79), Texeda, Kempbell (Venegas, 90), Kontreras, Bennette (Ruis, 46).
Yangi Zelandiya – Seyl, Kirven (Peyn, 79), Rid (Djast, 72), Tuiloma, Peynaker, Kakache, Lyuis (Stamenich, 80), Bell, Garbett (Ueyn, 60), Vud, Griv (Barbaruses, 60).
Ogohlantirishlar: Rid (70), Kontreras (90), Ruis (90).
Chetlatish: Barbaruses (69).