O‘zbekiston hamda Tailand uchrashuvidan so‘ng matbuot anjumani o‘tkazildi. Unda dastlab Tailand terma jamoasi bosh murabbiyi Aleshandre Pyolking ishtirok etib, o‘z fikrlari bilan o‘rtoqlashdi:

"Bugun O‘zbekiston munosib o‘yin ko‘rsatib, haqli g‘alabaga erishdi. O‘yinda raqiblarimiz juda ham kuchli jamoa ekanligini ko‘rsatib, pozisiyalarni o‘zgartirishda yuqori tezkorlik namoyish etishdi. O‘yin davomida biz nafaqat Eldor Shomurodovga, balki Jaloliddin Masharipovga ham qarshi individual himoyalanishni reja qilgandik. Lekin tarkibda boshqa ko‘plab yuqori darajadagi futbolchilar bor edi.

Bu uchrashuv biz uchun yaxshi test bo‘ldi. Chunki biz Osiyo kubogida aynan bu kabi yuqori darajadagi jamoalar bilan o‘ynaymiz. Bizda musobaqaga yaxshilab tayyorgarlik ko‘rish uchun bir yil vaqt bor. Bugun qanday kamchiliklarimiz borligini ko‘rib oldim. Buni ustida ishlab, musobaqada yanada yaxshiroq ishtirok etishimizga ishonaman", — dedi Pyolking.