JCH-2022ning so‘nggi ishtirokchilaridan biriga aylangan Avstraliya termasi qit’alararo «pley-off»da Peru jamoasi to‘sig‘idan o‘tishni uddaladi.
Asosiy voqea 120 daqiqalik o‘yindan so‘ng sodir bo‘ldi - bu yerda nafaqat penaltilar seriyasi, balki «kengurular»ning unga tayyorgarligi alohida e’tiborga molik.
Avstraliya termasi bosh murabbiyi Grem Arnold jamoa sardori va asosiy kiper Mettyu Rayan o‘rniga «Sidney» posboni Endryu Redmeynni tushirdi - u esa penaltilar seriyasi davomida o‘zining o‘zgacha «raqs»lari bilan raqiblarni chalg‘itishga urindi. Bir vaziyatda to‘singa sakrasa, keyingisida o‘tirib oldi. To‘g‘ri, dastlabki beshta zarbada uning harakatlari unchalik samara keltirmadi - faqat Advinkula ustunni nishonga oldi. Hal qiluvchi oltinchi zarbani esa Redmeyn qaytarib, qahramonga aylandi.
Endryu 33 yoshda, avvallari hech qachon Avstraliya tashqarisida to‘p surmagan, bu uning termadagi ikkinchi o‘yinidir. Uni penaltilarni bartaraf etish bo‘yicha mutaxassis deyish ham to‘g‘ri bo‘lmasa kerak - 16ta holatda 4ta zarbani qaytargan.
Ma’lumot uchun, Avstraliya termasi qatorasiga beshinchi marta JCH yo‘llanmasiga ega chiqdi - «yashil qit’a» vakillari 2006 yildan buyon mundialni o‘tkazib yuborishmayapti. Lekin faqat JCH-2006da guruhdan chiqib, 1|8 finalda g‘alati penalti tufayli italiyaliklarga yutqazishgandi.
