"Manchester Yunayted" hujumchisi Markus Reshford iyun oyida yaxshi dam olgani va jamoaning asosiy tarkibiga kirish uchun kurashishga tayyorligini aytdi.

"Mashg‘ulot maydoni atrofidagi muxlislarning g‘uvullashini eshitganimizda yana hayajonga tushamiz va bu mavsumoldi tayyorgarlikka kirishish istagiga ijobiy ta’sir ko‘rsatmoqda", dedi Reshford klub saytiga bergan intervyusida.

Uning ta’kidlashicha, endi asosiysi Erik ten Xag qurmoqchi bo‘lgan o‘yin tamoyillarini tushunish, shuningdek, o‘yindan yana zavq olishni o‘rganishdir. Futbolchi bir necha bor "Yunayted"dagi faoliyatini yangi bosh murabbiy Ten Xag qo‘l ostida "tiriltirmoqchi"ligini aytgandi.

O‘tgan mavsumda futbolchi Premyer-ligada 25 ta o‘yinda maydonga tushib, 4 ta gol urdi va 2 ta golli uzatmani amalga oshirdi.