«Vulverxempton» klubi markaziy yarim himoyachisi Joao Gomes kelayotgan yozgi transfer oynasida jamoani tark etishi mumkin. CaughtOffside nashrining xabar berishicha, Premyer-ligani tark etgan «bo‘rilar» o‘zlarining eng qimmat aktivlari bilan xayrlashishga tayyor.

Klub Gomesning sotuvidan kamida 46 million yevro ishlab olishni rejalashtirmoqda. Ma’lumotlarga ko‘ra, braziliyalik futbolchi uchun asosiy da’vogarlar «Liverpul» va «Manchester Yunayted» klublari bo‘lib turibdi. Shuningdek, yarim himoyachining transferi Madridning «Atletiko» hamda «Kristal Pelas» klublari tomonidan ham ko‘rib chiqilmoqda.

Ma’lumot uchun, Joao Gomes joriy mavsumda barcha turnirlarda 40 ta o‘yinda maydonga tushdi. Uning hisobida bitta gol va uchta golli uzatma mavjud.