«RB Leypsig» «Xoffenxaym»dan hujumchi Fisnik Aslanining transferini yakunladi va Yan Diomandening «Real Madrid»ga kutilayotgan o‘tishi oldidagi yana bir to‘siqni olib tashladi.

Bundesliga klubi 23 yoshli Kosovo terma jamoasi a’zosi bo‘yicha «Xoffenxaym» bilan to‘liq kelishuvga erishdi. Bitim qiymati taxminan 30 million yevroni tashkil etadi va Aslani 2031 yilgacha mo‘ljallangan shartnomaga imzo chekadi.

Transfer rasman e’lon qilinishidan oldin hujumchi payshanba kuni tibbiy ko‘rikdan o‘tishi rejalashtirilgan.

«Leypsig» Diomandega tibbiy ko‘rikdan o‘tish uchun Madridga uchishga ruxsat berishdan oldin ikki yoki uchta yangi futbolchi bilan shartnoma imzolashni rejalashtirgan edi.

Germaniya klubi 19 yoshli vinger Diomandening «Real»ga uzoq kutilgan transferiga «yashil chiroq» yoqishi kutilmoqda, u yerda futbolchi klub tarixidagi eng qimmat xaridga aylanadi.

Asslaniga transfer oynasi boshida «Barselona» ham qiziqish bildirgan edi, ammo yakunda «Leypsig» uning imzosi uchun kurashda g‘olib chiqdi.