Bekoboddagi o‘yindan keyin "Paxtakor" bosh murabbiyi Slavche Voyneski bellashuv xususida fikrlarini bildirdi.

"Birinchi bo‘lim ikki qismdan iborat bo‘ldi. Uchrashuvni yaxshi boshladik, biroq keyinchalik shogirdlarimda biroz charchoq yuzaga keldi. Bekobodga Toshkentdan kelib futbol o‘ynash istalgan jamoaga oson emas, biz ikki yarim soat yo‘l bosdik. Ikkinchi bo‘limda qanday futbol o‘ynash kerak bo‘lsa, shunday yo‘l tutdik. Futbolchilar talab qilingan vazifalarni bajarishdi. Ikkinchi bo‘lim juda yaxshi o‘tdi. G‘alaba bilan shogirdlarimni tabriklayman. Chempionlar Ligasidan so‘ng biroz og‘ir davrni boshdan kechirdik. Turnirdagi o‘yinlar qisqa muddat oralig‘ida o‘tkazildi, buning natijasida juda ko‘p energiya yo‘qotdik. Shundan so‘ng milliy chempionatda yuqori sur’atga tushib olishimiz qiyin bo‘ldi. Jamoada salohiyat yuqori, ikkinchi davrada ancha kuchayamiz. O‘zimiz qanday o‘ynashni xohlasak, bu borada mashg‘ulotlarda ishlaymiz. O‘ylashimcha, ikkinchi davra biz uchun yaxshi ruhda o‘tadi.

O‘yinchilarning holatini doim tahlil qilamiz. Shu sababli va turli pozisiyalarda to‘p tepa olishini bilganimiz uchun Hamrobekovni himoya markaziga joylashtirdik. U o‘yin jarayonini yaxshi nazorat qila oladi.

Cheran "Paxtakor"ning eng yaxshi o‘yinchilaridan biri, qolaversa, u jamoada anchadan beri o‘ynab kelmoqda. O‘ylashimcha, hujumchi yana 1-2 yil davomida yuqori saviyada o‘ynay oladi. Unga o‘rinbosar sifatida boshqa futbolchilarni tayyorlab borishga harakat qilyapmiz, masalan, Xolmatovni ushbu pozisiyada sinab ko‘ryapmiz. Agar u yetarlicha tajriba to‘play olsa, bu nuqtada kuchli futbolchiga aylanadi. Bugungi g‘alabani muxlislarga ham bag‘ishlaymiz, ulardan o‘tgan o‘yindagi mag‘lubiyat uchun uzr so‘rayman. Ular bizning qo‘shimcha o‘yinchimiz, o‘tgan bahsda ularni ranjitdik. Bugungi muvaffaqiyat to‘liq ularniki deb ayta olaman", — dedi Voyneski.