Jurnalist Nikolo Skira xabariga ko‘ra, "Roma" tez orada hujumchi Paulo Dibala bilan shartnoma imzolaganini e’lon qiladi.

Manbaga ko‘ra, yaqin soatlarda bu haqda rasmiy xabar berilishi kutilmoqda. 28 yoshli argentinalik futbolchi rimliklar bilan 2025-yilning iyun oyi oxirigacha shartnoma imzolaydi va uni yana bir yilga uzaytirish mumkin bo‘ladi. Futbolchi yiliga 4,5 million yevro maosh oladi va yana 1,5 million yevro bonuslar ishlab olishi mumkin bo‘ladi.

Shartnomada 20 million yevro miqdoridagi tovon puli ko‘zda tutilgan. Forvard 21 raqam ostidagi jamoada o‘ynaydi.

Dibala 1 iyuldan buyon erkin agent maqomiga ega. Argentinalikning sobiq klubi "Yuventus" hujumchi bilan shartnomani uzaytirmagan. O‘tgan mavsumda futbolchi barcha turnirlarda 39 ta o‘yinda maydonga tushib, 15 ta gol urdi va 6 ta golli uzatmani amalga oshirdi.