Xabaringiz bor, Turkiyaning «Hatko» kompaniyasi Toshkent viloyatida O‘zbekiston terma jamoalari uchun «Do‘stlik» bazasining qurilish-rekonstruksiya ishlarini amalga oshirmoqda.

Bugun O‘FA rahbariyati mazkur jarayonlari ko‘zdan kechirish, mas’ullar bilan suhbatlashish hamda kerakli tavsiyalar berish maqsadida qurilish ob’ektiga tashrif buyurdi.

Dastlab mazkur bazadan o‘rin olgan ob’ektlar, jumladan, mashg‘ulot maydonchasi va stadion loyihasining texnik-tashkliy jarayonlari bilan tanishildi.  Ob’ektdan o‘rin oladigan 2 ta gibrid va 2 ta sun’iy qoplamali futbol maydonlarini xalqaro standartlar asosida sifatli bunyod etish, ularning drinaj tizimlarini to‘g‘ri sozlash, kelgusida chimlarni saqlash va parvarishlar uchun kerakli qurilmalarni tashkil etish yuzasidan topshiriq berildi.   

Bundan tashqari, quruvchi kompaniya vakillariga barcha jarayonlarni jadallashtirish, qurilish ishlarini sifatli amalga oshirish bilan bir qatorda loyihalarning xavfsizlik jihatlariga alohida e’tibor qaratish kerakligi aytildi va kerakli ko‘rsatmalar berildi.  

Shuningdek, terma jamoalar futbol markazining tibbiy-tiklanish, yotoqxona va oshxonasini zamonaviy uskunalar bilan jihozlash yuzasidan fikr almashildi. Shaharchada kutubxona, restoran hamda yashil hudud tashkil etish loyihasi o‘rganilib, infratuzilmadan o‘rin olgan keyingi rejalari muhokama qilindi.