Hindistonning Chennay shahrida bo‘lib o‘tayotgan 44-Butunjahon shaxmat olimpiadasining uchinchi kuni o‘z yakuniga yetdi. 3-turda erkaklar terma jamoamiz ham, ayollar terma jamoamiz ham yana bir g‘alabasini qo‘lga kiritdi.

O‘zbekiston erkaklar terma jamoasi Slovakiya terma jamoasini 3:1 hisobida mag‘lub etib, ikkita durang va ikkita g‘alaba bilan yana ikki ochko jamg‘ardi. Oq donalarda o‘ynagan Abdusattorov va Sindarov g‘alaba qozonishgan bo‘lsa, qora donalar o‘ynagan Yoqubboyev va Shamsiddin Vohidov durang qayd etishdi. Ushbu g‘alabadan so‘ng O‘zbekiston erkaklar terma jamoasi o‘z ochkolarini 6taga yetkazib, 4-o‘rinda bormoqda. Terma jamoamiz 4-turda kuchli raqib — AQSHga qarshi bahslashadi.

O‘zbekiston ayollar terma jamoasi esa Zambiya terma jamoasi ustidan 4:0 hisobida to‘liq g‘alaba qozondi. Yoqubboyeva, Omonova, Bobomurodova va Hamdamova raqibga hech qanday imkoniyat qoldirishmadi. Ayollar terma jamoamiz esa 4 ochko jamg‘argan holda 51-pog‘onani egallab turibdi. Terma jamoamiz 4-turda Dominikan Respublikasiga qarshi dona suradi.

Ma’lumot uchun: O‘zbekiston erkaklar terma jamoasi 1-turda Nepal, 2-turda Farer orollari terma jamoasini mag‘lubiyatga uchratgan edi. Ayollar terma jamoamiz 1-turda Gana terma jamoasi mag‘lub etgan bo‘lsa, 2-turda AQSH terma jamoasiga yutqazib qo‘ygan edi.

Eslatib o‘tamiz: 45-Butunjahon shaxmat olimpiadasi 2024 yil Vengriya poytaxti Budapesht shahrida o‘tkaziladi. 2026 yil o‘tkaziladigan 46-Butunjahon shaxmat olimpiadasi mezbonligi uchun O‘zbekiston ham da’vogarlik qilmoqda.