Braziliya futbol konfederasiyasi prezidenti Ednaldo Rodriges Braziliya terma jamoasi JCH-2022 saralashida Argentinaga qarshi o‘yinda maydonga tushishni istamasligini aytdi.

"Murabbiylar shtabi pozisiyasidan kelib chiqib, o‘yin o‘tkazilmasligi uchun FIFAga murojaat qilmoqchimiz. Murabbiylar shtabiga qo‘limdan kelgancha yordam beraman. Bizning ustuvor vazifamiz oltinchi jahon chempionligini qo‘lga kiritish. Biz bu o‘yin o‘tkazilmasligini ta’minlashni istaymiz", - deya Rodrigesning so‘zlaridan iqtibos keltirmoqda Braziliya futbol konfederasiyasi rasmiy saytida.

Eslatib o‘tamiz, Braziliya - Argentina o‘yini 2021 yilning 5 sentyabr kuni San-Pauluda bo‘lib o‘tishi kerak edi. Biroq, o‘yin hushtagi chalinganidan so‘ng deyarli darhol o‘yin to‘xtatildi. Sababi, Braziliya sog‘liqni saqlash idoralari ma’lumotlariga ko‘ra, futbolchilar so‘nggi ikki hafta davomida o‘z yashash joylari to‘g‘risida noto‘g‘ri ma’lumotlarni taqdim etib, mamlakatga kirish qoidalarini buzgan. Takroriy o‘yin 2022 yil 5 sentyabrga belgilangan. Shu bilan birga, har ikki jamoa JCH-2022 final bosqichiga yo‘llanmani qo‘lga kiritib bo‘lgan.