Бразилия футбол конфедерацияси президенти Эдналдо Родригес Бразилия терма жамоаси ЖЧ-2022 саралашида Аргентинага қарши ўйинда майдонга тушишни истамаслигини айтди.

"Мураббийлар штаби позициясидан келиб чиқиб, ўйин ўтказилмаслиги учун ФИФАга мурожаат қилмоқчимиз. Мураббийлар штабига қўлимдан келганча ёрдам бераман. Бизнинг устувор вазифамиз олтинчи жаҳон чемпионлигини қўлга киритиш. Биз бу ўйин ўтказилмаслигини таъминлашни истаймиз", - дея Родригеснинг сўзларидан иқтибос келтирмоқда Бразилия футбол конфедерасияси расмий сайтида.

Эслатиб ўтамиз, Бразилия - Аргентина ўйини 2021 йилнинг 5 сентябрь куни Сан-Паулуда бўлиб ўтиши керак эди. Бироқ, ўйин ҳуштаги чалинганидан сўнг деярли дарҳол ўйин тўхтатилди. Сабаби, Бразилия соғлиқни сақлаш идоралари маълумотларига кўра, футболчилар сўнгги икки ҳафта давомида ўз яшаш жойлари тўғрисида нотўғри маълумотларни тақдим этиб, мамлакатга кириш қоидаларини бузган. Такрорий ўйин 2022 йил 5 сентябрга белгиланган. Шу билан бирга, ҳар икки жамоа ЖЧ-2022 финал босқичига йўлланмани қўлга киритиб бўлган.