Yozning eng kutilmagan transferi: "Manchester Yunayted" va Madrid klubi Kazemiro transferi bo‘yicha kelishib oldi. Kelishuv 60 million funtni tashkil etdi, bundan tashqari yana 10 millionni "Real" bonuslar ko‘rinishida olishi mumkin. Yaqin orada futbolchi tibbiy ko‘rikdan o‘tadi va "Manchester Yunayted" bilan 2027 yilgacha shartnoma imzolaydi.
"Qizil iblislar" bosh murabbiyi Erik ten Xag jamoaning markaziy yarim himoyasi kuchsizligini tushunish uchun Premyer-ligada ikkita o‘yin o‘tkazishi kerak edi. Brentford (0:4) va "Brayton" (1:2) bilan o‘yinlarda Fred va Skott MakTominay o‘zlarini umuman ko‘rsata olishmadi. Yarim himoyachilar raqibning tezkor qarshi hujumlariga xalaqit bera olishmayapti va to‘pni oldirib qo‘yishmoqda.
E’tiborlisi, Kazemiro 2022 yilgi UYEFA Superkubogi uchun "Ayntraxt"ga (2:0) qarshi o‘yinda to‘qqiz marta raqiblar hujumini buzgan, bu Fred va MakTominayning ikkita o‘yinda qilgan foydali harakatlari bilan bir xil.
Yangi chaqiruv va “yog‘li” shartnoma
Juma kuni 30 yoshli Kazemiro "Real Madrid"dagi jamoadoshlari bilan xayrlashdi. "Qaymoqranglilar" bosh murabbiyi Karlo Anchelotti matbuot anjumanida yarim himoyachining jamoani tark etish istagi borligini tasdiqladi va uning qaroriga xalaqit bermadi.
"Men Kazemiro bilan gaplashdim. U yangi sinovlarni xohlaydi. Biz uning qarorini tushunamiz”, dedi Anchelotti.
O‘zini boshqa chempionatda sinab ko‘rish istagi Kazemironi Angliyaga ko‘chib o‘tishga undagan yagona narsa emasligi aniq. Bu yerda bir qator boshqa muhim omillar mavjud:
maosh - "Manchester Yunayted"da ular yarim himoyachiga "Real"dagidan ikki baravar ko‘p maosh berishga tayyor (20 million yevro). Braziliyalik futbolchi klubda Krishtianu Ronaldu va David de Xeadan keyin eng ko‘p maosh oladigan uchinchi futbolchiga aylandi;
shartnoma muddati - "Manchester Yunayted" "4+1" sxemasi bo‘yicha shartnoma taklif qildi. Madridda futbolchining shartnomasi 2025 yilda tugaydi va uni uzaytirish mumkinligiga kafolat yo‘q edi;
zaxira o‘yinchisi istiqboli - 22 yoshli Aureliyen Tchuameni "Monako"dan "Real"ga 80 million yevro evaziga o‘tdi. Kazemiro istalgan vaqtda zaxiraga tushishi va madridliklarning o‘yinlarini o‘rindiqdan kuzatishi mumkin edi. Bunday so‘nggi misol "Real Madrid" uchun afsonaviy Marselo bo‘ldi, u so‘nggi mavsumlarda ko‘proq o‘rinbosarlik vazifasini o‘tadi.
Kazemiroda Premyer-ligaga xos keskin o‘yin uslubi bor. Raqiblar u bilan to‘qnashuvdan qochishni afzal ko‘rishadi.
“Men har doim to‘pni olib qo‘yish uchun keskin o‘ynashga harakat qilaman. Agar kimgadir jarohat yetkazsam, bu meni g‘azablantiradi. Qo‘pollik o‘yinning bir qismidir. Bu qadriyatlar menga onam tomonidan singdirilgan. Men hech qachon maydonda o‘yinchiga atayin jarohat yetkazishga urinmayman”, dedi Kazemiro Revista Panenka nashriga bergan intervyusida.
Kazemironing "Manchester Yunayted"ga o‘tishining maqsadga muvofiqligi savollar tug‘dirmoqda. Mankunianliklar 30 yoshga to‘lgan futbolchi uchun kamida 140 million funt ("Real" uchun 60, maosh uchun 80 million) sarflaydi. “Yunayted” boshliqlari uchun futbolchi shunchalik qadrli bo‘lib chiqdimi?
Kazemiro - "Manchester Yunayted" uchun eng yaxshi tanlov, ammo jamoada hozir juda ko‘p muammolar bor. Bunday xaridlardan biri vaziyatni tubdan o‘zgartirishi dargumon. Garchi bu, albatta, Angliya chempionatining 20-o‘rinini tark etish uchun yetarli bo‘lishi kerak.
