«Bolonya» klubi hamon «Roma» hujumchisi Eldor Shomurodovni qo‘lga kiritishdan umidni uzgani yo‘q. Ammo ayni paytda tomonlar o‘rtasidagi muzokara to‘xtab qolgan, klublar bir qarorga kela olishmayapti.

"Roma" va "Bolonya" klublari bir necha haftadan buyon ushbu masalada muzokara o‘tkazib kelishayotgan edi. Bolonyaliklar 27 yoshli futbolchini bir yilga ijaraga olib, kelasi yilda uning transferini, ma’lum shartlar bajarilgan taqdirda (oson shartlar emas), 10 million yevroga sotib olishni taklif etishdi. "Bo‘rilar" esa majburiy transfer uchun 14 million yevro talab qilishda davom etishmoqda.

Jurnalist Di Marsio tarqatgan xabarga ko‘ra, transfer muddati yakunlanib borgan sari "Roma" o‘zbekistonlik futbolchiga nisbatan qo‘ygan narxni pasaytirishiga "Bolonya" umid qilmoqda.

"Roma" bosh murabbiyi Joze Mourinyo hujumchi Shomurodovni o‘z rejalariga kiritmayapti hamda Eldorni "asosiy tarkibga tortadigan futbolchi" emas, deya atadi. Boz ustiga, Rim klubi Andrea Belotti bilan shartnoma imzolash uchun o‘zbekistonlik futbolchini sotishga majbur.