«Болонья» клуби ҳамон «Рома» ҳужумчиси Элдор Шомуродовни қўлга киритишдан умидни узгани йўқ. Аммо айни пайтда томонлар ўртасидаги музокара тўхтаб қолган, клублар бир қарорга кела олишмаяпти.

"Рома" ва "Болонья" клублари бир неча ҳафтадан буён ушбу масалада музокара ўтказиб келишаётган эди. Болоньяликлар 27 ёшли футболчини бир йилга ижарага олиб, келаси йилда унинг трансферини, маълум шартлар бажарилган тақдирда (осон шартлар эмас), 10 миллион еврога сотиб олишни таклиф этишди. "Бўрилар" эса мажбурий трансфер учун 14 миллион евро талаб қилишда давом этишмоқда.

Журналист Ди Марцио тарқатган хабарга кўра, трансфер муддати якунланиб борган сари "Рома" ўзбекистонлик футболчига нисбатан қўйган нархни пасайтиришига "Болонья" умид қилмоқда.

"Рома" бош мураббийи Жозе Моуриньо ҳужумчи Шомуродовни ўз режаларига киритмаяпти ҳамда Элдорни "асосий таркибга тортадиган футболчи" эмас, дея атади. Боз устига, Рим клуби Андреа Белотти билан шартнома имзолаш учун ўзбекистонлик футболчини сотишга мажбур.