S.Arabistoni. Butun hafta davomida Jaloliddin Masharipovning «Al-Nasr»dan» Misrning «Al-Ahli» klubiga o‘tishi haqidagi xabarlar keti uzilmadi.
Lekin ko‘rinishidan, hamyurtimiz amaldagi shartnomasi yakuniga qadar Ar-Riyod klubida qolishga qaror qildi. «Al-Nasr» esa Saudiya chempionati 1-turida «Al-Vahda» bilan o‘ynab, 1:0 hisobida g‘alaba qozondi. Masharipov Ispaniya yig‘inida orttirilgan bel jarohati tufayli bu uchrashuvda maydonga tushmadi. Uning O‘zbekiston milliy jamoasining Kamerun va Kosta-Rika termalariga qarshi o‘rtoqlik uchrashuvlarida qatnashishi ham so‘roq ostida. Aytish joiz, 28 yoshli legionerimizning «Al-Nasr» bilan xayrlashgani va Qohira klubi bilan 3 yillik shartnoma tuzishi aytilgandi. Hattoki, misrliklar bir yillik ijara uchun saudiyaliklarga 600 ming dollar to‘lashlari, kelasi mavsum esa uning transferini 2 millionga sotib olishlari ma’lum qilingandi. Qolaversa, Masharipovning yillik maoshi 1,5 million dollarni tashkil etishi haqida ham xabar berilgandi. Jaloliddinning aytishicha, u BAAning «Shabab Al-Ahli» va Angliyaning «Xall Siti» klublaridan ham taklif olgan ekan.
Rossiya. «Torpedo» RPL 7-turida «Krasnodar»ni qabul qilib, 1:4 hisobida imkoniyatni boy berdi. Moskva klubidagi hamyurtimiz Hojimat Erkinov ushbu omadsiz uchrashuvningn 70-daqiqasigacha maydonda to‘p surdi. Ibrohimxalil Yo‘ldoshevning jamoasi - «Pari NN» esa «Dinamo» bilan o‘yinda 0:2 hisobida yutqaza turib, yakunda «kambek»ka erishdi - 2:2. Hamyurtimiz bu safar boshlang‘ich tarkibda maydonga tushdi va tanaffusda o‘z o‘rnini zaxira vakiliga bo‘shatib berdi.
Eron. «Persepolis» bilan xayrlashgan Sherzod Temirov forslar yurtida qoladigan bo‘ldi. 23 yoshli hujumchimiz «Paykon» bilan rasman shartnoma tuzdi.
Italiya. «Bolonya» hamon «Roma»da amaliyotsiz qolayotgan Eldor Shomurodovni o‘z safiga qo‘shib olishdan umidvor. Calciomercato nashri xabariga qaraganda, bolonyaliklar yaqinda «Bavariya» vakili Joshua Zirkzee bilan shartnoma tuzgan bo‘lsalarda, hamyurtimiz transferidan hali voz kechishmagan. «Roma»ga kelsak, jamoa «A» seriya 3-turidan o‘rin olgan «Yuventus»ga qarshi safar uchrashuvini Shomurodovsiz o‘tkazib, ortga 1:1 hisobi va 1 ochko bilan qaytdi. Aytgancha, Eldorga «Salernitana» ham befarq emas. Qolaversa, «Trabzonspor» ham hamyurtimiz atrofidagi voqealarni kuzatmoqda.
Turkiya. Otabek Shukurov «Fotih Qoragyumryuk» bilan ilk g‘alabani nishonladi. Andrea Pirlo shogirdlari «Anqaragyujyu» (Superliga 4-turi)ni 4:1 hisobida dog‘da qoldirgan bahsda legionerimiz to‘liq vaqt to‘p surib, yakunda sariq kartochka ham oldi.
Belarus. «Energetik-BGU» Oliy liga 19-turida o‘z maydonida «Dinamo-Brest» bilan o‘ynab, raqib darvozasiga yo‘l topolmadi. Jumladan, «talabalar» to‘purari Bobur Abduxoliqovning 90 daqiqalik urinishlari zoye ketdi. «Energetik-BGU»dagi yana bir vakilimiz Abduqodir Husanov esa 0:0 hisobida tugagan o‘yinda ko‘rinish bergani yo‘q.
Qozog‘iston. Sports.kz xabariga ko‘ra, «Tobol» hujumchisi Igor Sergeev Moskvaning «Torpedo» klubi e’tiborida turibdi. Agar transfer amalga oshsa, 29 yoshli legionerimiz Hojimat Erkinovning klubdoshiga aylanadi.
Qatar. «Umm Salal» Yulduzlar ligasi 4-turiga kelib, mavsumdagi ilk g‘alabasini nishonladi. Jamoa Sardor Rashidov 75 daqiqa to‘p surgan bahsda «Al-Sayliya»ni yagona gol evaziga dog‘da qoldirdi. «Al-Sadd» - «Al-Garafa» to‘qnashuvida esa mehmonlar 2:1 hisobida ustun kelishdi. Islom To‘xtaxo‘jayev bu g‘alabaga to‘liq vaqt davomidagi faolligi bilan hissa qo‘shdi. U o‘yin bayonnomasiga ham kirdi, faqat sariq kartochka tufayli.
