"PSJ" hujumchisi Kilian Mbappe kelajakda "Real"ga o‘tishini istisno qilmadi.
O‘tgan yozda 23 yoshli fransiyalik futbolchi Madridga o‘tishi mumkin edi, ammo Parij klubi bilan shartnomasini uzaytirdi.
"Men "Real"da o‘ynamaganman, ammo bu klub mening uyimga o‘xshaydi. Kelajakda nima bo‘lishini hech qachon bilmaysiz", - deya Mbappening so‘zlarini keltiradi The New York Times.
Joriy mavsumda hujumchi parijliklar safida 5 ta uchrashuvda 7 ta gol urdi. Uning klub bilan shartnomasi 2025 yilning 30 iyuniga qadar amal qiladi.
Transfermarkt portali futbolchining narxini 160 million yevroga baholamoqda.
