O‘zbekiston futbol assosiasiyasi Tartib-intizom qo‘mitasining navbatdagi yig‘ilishi bo‘lib o‘tdi. Unda Superliganing 18-turi doirasidagi «So‘g‘diyona» — «Navbahor» uchrashuvi yakunlangandan so‘ng «Navbahor» futbol klubining bosh murabbiyi Samvel Babayan bilan mahalliy muxlis hamda OAV vakili ishtirokida vujudga kelgan vaziyat o‘rganib chiqildi.

2022 yilning 10 sentyabr kuni bo‘lib o‘tgan «So‘g‘diyona» — «Navbahor» uchrashuvi komissaridan kelib tushgan bildirgiga asosan, «Navbahor» futbol klubining bosh murabbiyi Samvel Babayan uchrashuv yakunlangandan so‘ng matbuot anjumani zaliga kirish chog‘ida mahalliy muxlis bilan tortishgani, mazkur holatni o‘zining telefoni orqali video tasvirga tushirib turgan championat.asia sayti fotomuxbiri Jahongir Fayzullayevni ko‘rib qolgani, Samvel Babayan o‘z yordamchilariga ushbu telefonga yozilgan video materialni o‘chirishini buyurgani, yordamchilari esa jurnalistga tazyiq o‘tkazib, telefondagi yozuvlarni o‘chirtirishga majbur qilgani aniqlandi.

Mazkur vaziyat Tartib-intizom qo‘mitasining yig‘ilishida «Navbahor» futbol klubi bosh murabbiyi Samvel Babayan, championat.asia sayti fotomuxbiri Jahongir Fayzullayev, ushbu sayt jurnalisti Faxriddin Ro‘ziyev ishtirokida ko‘rib chiqildi. Yig‘ilishda taraflarning ko‘rsatmalari, taqdim etilgan ma’lumotlar asosida Samvel Babayan etika qoidalariga zid xatti-harakatlar sodir etgan deb topildi.

Tartib-intizom qo‘mitasining qaroriga ko‘ra, Samvel Babayanga nisbatan jarima intizom chorasi qo‘llanildi.

Barcha murabbiy, futbolchi, hakam va rasmiylarga murojaat qilib, har qanday vaziyatda ehtiroslarga berilmasdan, og‘ir-vazmin va professional bo‘lishga chaqiramiz. Shu o‘rinda Sizlar o‘sib kelayotgan yoshlar uchun o‘rnak-namuna ekanliklaringizni yana bir bor eslatib o‘tamiz!