"PSJ" yarim himoyachisi Marko Verratti jarohati sabab "Lion"ga qarshi o‘yinda maydonni tark etishga majbur bo‘ldi.
29 yoshli italiyalik futbolchi 64-daqiqada o‘yinni muddatidan avval yakunlab, o‘rnini Nordi Mukielga bo‘shatib berdi. Yarim himoyachini almashtirishga tizzasidagi jarohat sabab bo‘ldi. Bugun Verratti jarohatining holatini aniqlash uchun tibbiy ko‘rikdan o‘tadi. Futbolchi Italiya terma jamoasining Millatlar ligasida Angliya (23 sentyabr) va Vengriya (26 sentyabr) terma jamoalariga qarshi navbatdagi o‘yinlarini o‘tkazib yuborish xavfi bor.
"PSJ" Fransiya chempionati doirasidagi o‘yinda "Lion"ni (1:0) mag‘lub etishga muvaffaq bo‘ldi. Yagona gol 5-daqiqada Neymarning uzatmasidan keyin Lionel Messi tomonidan kiritildi.
