Angliya futbol ligasi (EFL) energetik inqiroz tufayli o‘yinlarning boshlanishini ertaroq vaqtga ko‘chirish masalasini ko‘rib chiqmoqda. Bu haqda "The Independent" xabar tarqatdi.
Manbaga ko‘ra, Liga ushbu masalada 40ta klubga so‘rov yuborgan. Ularning 63 foizi elektr energiyani tejash maqsadida o‘yinlarni ertaroq vaqtga ko‘chirish masalasini ko‘rib chiqishga tayyor ekanini ma’lum qilgan. Ushbu chora Angliya kubogi uchrashuvlariga ham tatbiq qilinishi mumkin.
Avvalroq Buyuk Britaniya hukumati elektr energiyasi narxi oshishi munosabati bilan zarar ko‘radigan tadbirkorlarni qo‘llab-quvvatlashi ma’lum bo‘lgandi. Hukumatning ushbu chorasi futbol klublariga ham taalluqli bo‘ladimi yoki yo‘qmi, hozircha noma’lum.