"Barselona" va Urugvay terma jamoasi himoyachisi Ronald Arauxo jarrohlik amaliyotiga muhtoj bo‘lishi mumkin, deya xabar beradi klub rasmiy sayti.
23 yoshli futbolchi Eron bilan o‘rtoqlik uchrashuvida (0:1) jarohat olgandi. Manbaga ko‘ra, urugvaylik futbolchi o‘ng sonning qo‘shimcha mushak payini yorib olgan.
Qatarda bo‘lib o‘tadigan jahon chempionati munosabati bilan Arauxo va uning vakillari tezroq bo‘ladigan an’anaviy muolajalarni o‘tkazish yoki jarohatni davolashga ko‘proq yordam beradigan jarrohlik muolajalarini o‘tkazish haqida qaror qabul qilishlari kerak. Aniq qaror yaqin ikki kun ichida qabul qilinadi.
Joriy mavsumda Arauxo "Barselona" safida barcha musobaqalarda 7 ta o‘yin o‘tkazdi.
