Braziliyalik sobiq yarim himoyachi Kaka nega futbolchilik faoliyatini yakunlaganidan keyin yugurishni boshlashga qaror qilganini aytdi.

"Men har doim mashg‘ulotlardan zavqlanganman va professional futboldan ketganimdan so‘ng, men buni davom ettirdim, lekin haqiqat shundaki, endi mening maqsadim yo‘q edi. Aynan Braziliyada bir necha kishi bilan suhbatlashganimdan so‘ng men marafonda yugurishga qaror qildim", - dedi 40 yoshli sportchi Marca nashri bilan suhbatda.

Kaka Chempionlar ligasi va marafon poygasi o‘rtasidagi farq nimada ekanligini ham tushuntirib berdi.

"Bosim boshqacha, shuning uchun hislar ham boshqacha. Professionallardek futbol o‘ynasang, ko‘p odamlar senga katta umidlar bilan qarashadi, bu yerda esa hammasi men his qilganimdek o‘tadi", - deya qo‘shimcha qildi u.

Sportchi futbolchilik faoliyatini 2017 yilda yakunlagan. U o‘ynagan so‘nggi klub "Orlando Siti" edi. Kaka shuningdek, braziliyalik “San-Paulu”, Italiyaning “Milan” va Ispaniyaning “Real Madrid” klublarida ham o‘ynagan.

2007 yilda braziliyalik yarim himoyachi "Oltin to‘p"ni qo‘lga kiritdi.

Braziliyalik futbolchi 25 sentyabr kuni bo‘lib o‘tadigan "Berlin marafon-2022"da ishtirok etadi.