Бразилиялик собиқ ярим ҳимоячи Кака нега футболчилик фаолиятини якунлаганидан кейин югуришни бошлашга қарор қилганини айтди.
"Мен ҳар доим машғулотлардан завқланганман ва профессионал футболдан кетганимдан сўнг, мен буни давом эттирдим, лекин ҳақиқат шундаки, энди менинг мақсадим йўқ эди. Айнан Бразилияда бир неча киши билан суҳбатлашганимдан сўнг мен марафонда югуришга қарор қилдим", - деди 40 ёшли спортчи Marca нашри билан суҳбатда.
Кака Чемпионлар лигаси ва марафон пойгаси ўртасидаги фарқ нимада эканлигини ҳам тушунтириб берди.
"Босим бошқача, шунинг учун ҳислар ҳам бошқача. Профессионаллардек футбол ўйнасанг, кўп одамлар сенга катта умидлар билан қарашади, бу ерда эса ҳаммаси мен ҳис қилганимдек ўтади", - дея қўшимча қилди у.
Спортчи футболчилик фаолиятини 2017 йилда якунлаган. У ўйнаган сўнгги клуб "Орландо Сити" эди. Кака шунингдек, бразилиялик “Сан-Паулу”, Италиянинг “Милан” ва Испаниянинг “Реал Мадрид” клубларида ҳам ўйнаган.
2007 йилда бразилиялик ярим ҳимоячи "Олтин тўп"ни қўлга киритди.
Бразилиялик футболчи 25 сентябрь куни бўлиб ўтадиган "Берлин марафон-2022"да иштирок этади.
