Agar «Barselona» endi o‘yinchilar xaridi uchun kam sarflaydi, deb o‘ylasangiz, adashasiz.
Mish-mishlarga ko‘ra, klub kelasi yozda «Kamp Nou»ga birinchi darajali futbolchilarni taklif qilish ustida ishlamoqda. Quyida ulardan ba’zilari keltirilgan.
Leo Messi
Argentinalik futbolchining ajoyib tarzda qaytishi «Barsa» muxlislarining orzusi. Xabar qilinishicha, 35 yoshli futbolchi kelajagi borasida yakuniy qarorni dekabr oyida yakunlanadigan JCH-2022dan keyin qabul qiladi. Qayd etilishicha, parijliklar ham uning shartnomasini 2024 yilgacha uzaytirishga tayyor.
Bernardu Silva
Diario Sport vakilining so‘zlariga ko‘ra, Mateu Alemani keyingi yozda yana otni qamchilaydi. Portugaliyalik yarim himoyachi «Barsa»ning 2022 yildagi eng katta transfer maqsadlaridan biri edi, ammo to‘rtta iqtisodiy dastakni faollashtirish shartnomani imzolash uchun yetarli emasdi, to‘g‘risi.
Dani Olmo
«La Masiya»ning sobiq iqtidori Joan Laportaning uzoq muddatli transfer maqsadlaridan biri ekanligi aytilmoqda. Ma’lumotlarga ko‘ra, «Barselona» 24 yoshli futbolchi bilan 2023 yilda birlashish borasida og‘zaki kelishuvga ega. Uning «RB Leypsig» bilan amaldagi shartnomasi 2024 yilda tugaydi, shuning uchun u arzonlashtirilgan narxda sotiladi.
Ruben Nevesh
Shubhasiz, 25 yoshli futbolchini sotib olishga qaror qilgan taqdirda, Xorxe Mendesh «Barselona»ga yordam beradi. Tayanch yarim himoyachisi Serxio Busketsning potensial davomchisi sanaladi. Uning «Vulverxempton»dagi amaldagi shartnomasi ham ikki yildan kamroq vaqt ichida tugaydi.
Joau Feliks
Aytishlaricha, Joan Laporta portugaliyalik iqtidorlarning ashaddiy muxlisi. «Barsa» prezidenti Feliksning potensial transferini Xorxe Mendesh bilan bir necha bor muhokama qilgan, ammo 22 yoshli futbolchi Chempionlar ligasida o‘ynamasagina, «Atletiko»ni tark etadi. Keling, kelasi yozda vaziyat qay tomonga o‘zgarishini ko‘ramiz.
Florian Virts
Nemis iste’dodi «Barsa» muxlisi bo‘lib, u bir necha bor «ko‘k-anorranglilar» bilan bog‘langan. Xabar qilinishicha, «Bayer» 19 yoshli futbolchiga 150 million yevroga narxlagan, biroq bu uning jiddiy jarohat olishidan oldin edi...
Rafael Leao
Joriy mavsumni fantastik o‘tkazayotgan portugaliyalik vinger «Milan» bilan katta g‘alabalarni orzu qilmoqda. Ayrimlarning aytishicha, shaxsan Ronaldinyo 23 yoshli futbolchini hozirgi kunning eng zo‘r o‘yinchilardan biri deb biladi. Albatta, agar Leao keyingi qadamni qo‘yishga qaror qilsa, «Barselona» poygada bo‘lardi.
Trent Aleksandr-Arnold
Bu yerda ko‘pam umid qilish yaramaydi. Bir xabarda aytilishicha, «Barselona» yulduz qanot himoyachisi uchun 80 million yevro taklif qilmoqchi. Bu shubhali manba tomonidan berilgan, ammo biz buni e’tiborsiz qoldira olmaymiz. «Liverpul» hozir inqirozda. Agar ularning mavsumi rejadagidek o‘tmasa, hamma narsa bo‘lishi mumkin.
M.Po‘latov tarjimasi
