«Nasaf» bosh murabbiyi Ro‘ziqul Berdiyev Superliga 20-turi doirasida «Paxtakor»ga qarshi kechgan bahsdagi g‘alabadan (1:0) so‘ng o‘z fikrlari bilan o‘rtoqlashdi.

— 90 daqiqa, balki undan ham ko‘proqdir, e’tiborni yo‘qotmasdan o‘ynadik. Himoyada tartibli o‘ynab «Paxtakor»ga vaziyat yaratishga imkon bermadik va qarshi hujumda judayam yaxshi harakat qildik. Ishtiyoq, taktik va jismoniy tomonlama raqibdan ustun keldik, shu sababli g‘alaba qozondik.

Aliqulov va Mozgovoyning to‘qnashib ketgani borasida
— Ular havodagi kurashlarda yaxshi o‘ynaydi. Birinchi navbatda ikkalasi maydonni tark etishidan qo‘rqdim. Sababi «Paxtakor» ikkinchi qavatda yaxshi o‘ynaydi va Aliqulov bu bahsda juda zarur edi. Shukrki, o‘sha vaziyat biz uchun yaxshi tugadi va har ikkala futbolchi to‘liq o‘ynadi.

Mateus Lima Kruzning o‘yini haqida
— Albatta, jamoaga yordam berdi, ko‘p mehnat qildi. To‘g‘ri, Lima Kruz boshida kelganida jamoa o‘yiniga kirishib ketishiga vaqt kerak edi. Jismoniy holatini ham yaxshilab olishimiz kerak edi. Uning va barcha futbolchilarning o‘yinidan qoniqdim. Ular maydonda katta ko‘lamdagi ishni bajardi. Himoyada hech qanday xatosiz o‘ynadik.

«Paxtakor» yetakchilariga qarshi personal o‘yin haqida
— Cheran, Banashak, Hamrobekov va Alijonovga personal o‘ynadik. Hamrobekovga qarshi Bozorovni qo‘ydik, bu o‘zini oqladi. Hamrobekov birorta hujum boshlab bermadi. Ikkita markaziy yarim himoyachi esa Cheranni to‘xtatib qoldi. Himoyachilarimiz Banashakni yaxshi yopishdi.

«Nasaf»ning bosimga qay darajada tayyor ekani borasida
— Bosimga yigitlar ko‘nikib bormoqda. Ruhan ham o‘sib boryapti. Bosim katta bo‘lgan o‘yinlarda harakat qildik: bu o‘yinda, OCHL pley-off, OCHL guruh bosqichi o‘yinlari. Yigitlar bu o‘yinlarda bosimga bardosh berdi.

Kubok yoki chempionatdan birini tanlashga to‘g‘ri kelib qolish ehtimoli haqida
— Oldimizda chempionat o‘yinlari va kubok o‘yinlari ham bor. Zaxira imkoniyatlarimizdan to‘liq foydalanib har ikkala frontda oxirigacha kurashamiz.