Madridning “Atletiko” klubi bosh murabbiyi Diyego Simeone La Liganing 9-turida “Atletik” ustidan qozonilgan g‘alabadan keyingi fikrlari bilan o‘rtoqlashdi. “Matraschilar” 1:0 hisobida zafar quchdi, yagona gol fransiyalik Antuan Grizmann hisobiga yozildi.
“Oxirgi uchrashuvda biz haqiqiy kuchimizni ko‘rsatdik. Jamoa bilan ishlash meni ilhomlantirishda davom etmoqda. “Matraschilar”ga 11 yildan beri murabbiylik qilaman va futbolchilarim Bilbaoga qarshi o‘yinda ko‘rsatgan futbol menga juda yoqdi”, — dedi argentinalik mutaxassis Marca nashri bilan suhbatda.
Ispaniya chempionatining to‘qqiz turi yakunlariga ko‘ra, madridliklar 19 ochko jamg‘arib, turnir jadvalida uchinchi o‘rinda bormoqda.
