Dunyoning eng katta voqeligi bir oy ichida start oladi. O‘z mamlakatlari sharafini himoya qilish uchun boradigan muxlislar uchun joylar yetarli emas. Ammo Qatar hukumati bu muammoning bir qismini yechishga muvaffaq bo‘ldi. Endilikda, O‘rta Sharqqa boruvchi turistlar uchun yana qo‘shimcha 30 ming turar joy yaratildi. Ammo masalaning boshqa tomoni ham bor. U joylar na uy va na mehmonxona.
Hukumat ehtiyojni maksimum qondirish maqsadida kema konteynerlaridan boshpanalar mavzesini barpo etdi. Ammo ushbu konteynerlar shunday jihozlanganki, unda odamlar o‘zlarini uydagidek his qilishadi. Eng asosiysi esa ushbu massivlarning narxi ancha arzon – tuniga 200 funt-sterlingni tashkil etadi.
Bu haqida Qatar-2022'ning rasmiy saytida shunday deyiladi: "Hozirda "Zafaron" deb nomlangan muxlislar turar joyi yaratildi. U mehmonlarga bir yoki ikki kishi, yoki bo‘lmasa, ikki kishi, ammo alohida-alohida yashashga imkon beradi. Har bir xonada choy, qahva tayyorlash imkoni mavjud. Har kuni 2 idishda suv taqdim etiladi. Muzlatkich, yotoqxona va dush tizimi bilan jihozlangan. Ovqatlanish shahobchalari juda ham yaqin. Metroga tushish uchun juda qulay. Bu esa muxlislarga Dohaning istalgan joyiga qiynalmasdan yetib olish imkonini beradi. Jahonning istalgan fuqarosi bu yerda bir tun uchun 183 funt to‘lab, yashashi mumkin".
Qatar noyabrdan boshlab 1 million 200 ming turistni qabul qiladi. Ammo hali ham mamlakatda ularni sig‘dirish imkoni mavjud emas. Mehmonxonalarning o‘zi futbolchilar va turnirga aloqador insonlar bilan to‘lib qoladi. Shu sabab, ko‘pchilik mehmonlar qo‘shni davlatlardan joy olishi kutilmoqda.
Qatar hukumati vakili Yosir Al-Jamol yuqoridagi turar joy majmuasi haqida fikr bildirar ekan, jumladan, shunday deydi: "Muxlislar uchun turar joy masalasi o‘ta katta muammo. Hademay bunga bo‘lgan talab oshib ketadi. Shu munosabat bilan biz qo‘shimcha 30 ming o‘ringa mo‘ljallangan turar-joy hududlarini barpo etdik. Bu orqali esa Qatar 1 milliongacha mehmonni qabul qila olishi mumkin bo‘ldi. Bundan juda mamnunmiz".
Qatardagi mundialda muxlislar kuniga 19 soat davomida spirtli ichimliklar iste’mol qila oladi. Xususan, pivoning narxi 8 funt-sterlingga teng bo‘ladi. Ammo qoidaga amal qilmagan muxlislar jarimaga tortilishi ham mumkin. Eslatib o‘tamiz, navbatdagi mundial 2022 yilning 20 noyabrida, Qatar hamda Ekvador o‘rtasidagi o‘yin bilan boshlanadi.
ISMATOV J.
