2023 yilning mart oyida yurtimiz maydonlarida bo‘lib o‘tadigan U-20 Osiyo kubogi o‘yinlariga qizg‘in tayyorgarlik ishlari davom etmoqda. Xususan, O‘FA ishchi guruhi tomonidan o‘yinlar va mashg‘ulotlar bo‘lib o‘tadigan hududlar hamda u yerdagi mavjud sharoitlar o‘rganilib, OFK standartiga mos kelishini ta’minlash bo‘yicha sa’y-harakatlar olib borilyapti.

Chempionat o‘tkazishga mas’ul bo‘lgan Osiyo futbol konfederasiyasi delegasiyasi mamlakatimizga yetib keldi. Kecha O‘zbekiston futbol assosiasiyasida OFK va O‘FA vakillari ishtirokida U-20 tayyorgarlik ishlariga bag‘ishlangan uchrashuv bo‘lib o‘tdi. Dastlab OFK vakillari O‘zbekistonning mazkur yirik turnirga mezbonlik qilayotgani uchun minnatdorchilik bildirdilar.

O‘z o‘rnida, O‘FA birinchi vise-prezidenti Ravshan Ermatov O‘zbekiston so‘nggi yillarda bir qancha qit’a musobaqalarini o‘tkazib, katta tajriba to‘plagani va bu bo‘lg‘usi turnirlar oldidan muhim ekanligini aytib, OFK tomonidan bildirilayotgan ishonchdan mamnun ekanligini bildirdi. Musobaqalar geografoyasi kengayib borayotgani, nafaqat poytaxt, balki bir qancha viloyatlarda ham OFK standarti asosida futbol infratuzilmalari rivojlanayotganini ta’kidlab o‘tdi. Shuningdek, bo‘lajak yirik turnirni ham muvaffaqiyatli o‘tkazish borasida barcha ishlar tashkil etilishini qo‘shimcha qildi.

Shundan keyin OFK vakillari yaqinda qayta ta’mirdan chiqqan «JAR» stadionini ko‘zdan kechirishdi va maydonining sifatini yuqori baholashdi. Bundan tashqari, kiyim almashtirish va tashkiliy-ma’muriy xonalari ham o‘rganib chiqildi.

Rejaga muvofiq, delegatlar «Lokomotiv», «Bunyodkor» hamda «Istiqlol» stadionida inspeksiya ishlarini amalga oshirishlari kutilmoqda.