2023 йилнинг март ойида юртимиз майдонларида бўлиб ўтадиган U-20 Осиё кубоги ўйинларига қизғин тайёргарлик ишлари давом этмоқда. Хусусан, ЎФА ишчи гуруҳи томонидан ўйинлар ва машғулотлар бўлиб ўтадиган ҳудудлар ҳамда у ердаги мавжуд шароитлар ўрганилиб, ОФК стандартига мос келишини таъминлаш бўйича саъй-ҳаракатлар олиб бориляпти.

Чемпионат ўтказишга масъул бўлган Осиё футбол конфедерацияси делегацияси мамлакатимизга етиб келди. Кеча Ўзбекистон футбол ассоциациясида ОФК ва ЎФА вакиллари иштирокида U-20 тайёргарлик ишларига бағишланган учрашув бўлиб ўтди. Дастлаб ОФК вакиллари Ўзбекистоннинг мазкур йирик турнирга мезбонлик қилаётгани учун миннатдорчилик билдирдилар.

Ўз ўрнида, ЎФА биринчи вице-президенти Равшан Эрматов Ўзбекистон сўнгги йилларда бир қанча қитъа мусобақаларини ўтказиб, катта тажриба тўплагани ва бу бўлғуси турнирлар олдидан муҳим эканлигини айтиб, ОФК томонидан билдирилаётган ишончдан мамнун эканлигини билдирди. Мусобақалар географояси кенгайиб бораётгани, нафақат пойтахт, балки бир қанча вилоятларда ҳам ОФК стандарти асосида футбол инфратузилмалари ривожланаётганини таъкидлаб ўтди. Шунингдек, бўлажак йирик турнирни ҳам муваффақиятли ўтказиш борасида барча ишлар ташкил этилишини қўшимча қилди.

Шундан кейин ОФК вакиллари яқинда қайта таъмирдан чиққан «ЖАР» стадионини кўздан кечиришди ва майдонининг сифатини юқори баҳолашди. Бундан ташқари, кийим алмаштириш ва ташкилий-маъмурий хоналари ҳам ўрганиб чиқилди.

Режага мувофиқ, делегатлар «Локомотив», «Бунёдкор» ҳамда «Истиқлол» стадионида инспекция ишларини амалга оширишлари кутилмоқда.